Geiranger - Skageflå -Homlongsetra

07.08.2022

Turen om Skageflå og Homlongsetra startar med båttur frå Geiranger sentrum til Skagehola, og fører ned til Geiranger att. Det tek 5-6 timar, i alle fall om ein reknar med båtturen. 

Eg har tatt turen to gonger, med utgangspunkt i Skjåk, derifrå er det vel ein times køyretur til Geiranger. Båtturen har eg bestilt på førehand. Det er eigentleg ein sightseeingstur med guiding på tape, og den går eit stykke lenger ut enn dit vi skal, svingar og køyrer innom Skagehola. Det går fleire turar for dagen. Ein del folk hoppar av i Skagehola, andre har vore oppom fjellgarden og stig om bord. 
Stigen opp til Skageflå er bratt, men den er godt tilrettelagt. Og turen tar ikkje så lang tid, ein er oppe på fjellgarden før ein veit ordet av det.  

Også vegen vidare frå Skageflå er bratt den første delen, men her også er det fleire stader trapper og noko å halde seg i, særleg på dei meir luftige strekka. Utsynet over fjord og fjell er fantastisk. 

Eit stykke oppe går stigen inn i skogsområde. Men fleire stader kan ein gå utpå kanten og nyte utsynet. Dette området har også sin Preikestol. 


Etter å ha følgt stigen eit godt stykke i lett og flatare terreng, kjem vi Homlongsetra. Her er det fint å ta matpause, om ein ikkje har gjort det før. 
Stigen frå Homlongsetra ned att til Geiranger går i hovudsak gjennom skogen, derfor kjennest den ikkje så luftig, sjølv om det er bratt ned mot fjorden. Her og der er det likevel opning så ein kan sjå fjorden. 

Mot slutten av turen opnar landskapet seg att. Det er berg og grasbakkar, og reine idyllen ned til staden Homlong. Her er det også camping. 


Frå Homlong er det bilveg til Geiranger sentrum. Men sidan bilen truleg står parkert der, er det lett å bruke beina også det siste stykket, eit par kilometer langs fjorden og til sentrum. 

ANDRE VESTLANDSTURAR

Tafjordfjella - Zakariasdammen-Reindalsseter-Veltdalshytta 

Share